ᐊᓐᓇᐅᒪᒃᑯᑦ ᐅᐱᒍᓱᒃᑐᑎᒃ ᑐᓴᖅᑎᑦᑎᔪᒪᔪᑦ ᐱᖃᑕᐅᔪᓂᒃ 2025-26-ᒥ ᐃᓄᐃᑦ ᓴᓇᖖᒍᐊᖅᑎᓄᑦ ᐃᓕᖅᑯᓯᖕᒋᓐᓄᓪᓗ ᐊᖕᒋᖃᑎᒌᖕᓂᒃᑯᑦ ᑐᓐᓂᖅᑯᓯᐊᖅᑎᑦᑎᓂᕐᒥᑦ ᐱᓕᕆᖃᑎᒌᓐᓂᐊᖅᑐᓂᒃ. ᐊᑐᓂ ᑖᒃᑯᐊ ᑲᑐᔾᔨᖃᑎᒌᖕᒍᔪᑦ ᐊᖕᒋᖅᓯᒪᑦᑎᐊᖅᑐᑦ ᐃᓂᒃᓴᖃᖅᑎᑦᑎᔪᒪᓪᓗᑎᒃ ᐃᓄᐃᑦ ᓴᓇᖖᒍᐊᖅᑐᓂᑦ ᐱᕚᓪᓕᕐᕕᒋᔪᓐᓇᖅᑕᖕᒋᓐᓂᒃ. ᓴᓇᖖᒍᐊᕐᓂᖅ ᐃᓕᖅᑯᓯᕐᓗ ᓴᖖᒋᒃᑎᒋᐊᖅᑎᑦᑎᕙᒃᑐᖅ ᓄᓇᓕᖕᓂ ᖃᓄᐃᖖᒋᑦᑎᐊᕈᓐᓇᕐᓂᕐᒥᒃ, ᐃᑲᔪᖅᑐᐃᕙᒃᑐᓂᓗ ᒪᒥᓴᕐᓂᕐᒥᒃ, ᓴᖅᑭᑎᑦᑎᕙᒃᑐᓂᓗ ᐊᑐᖅᓯᒪᔭᒥᓂᒃ, ᓄᓇᐅᑉ ᑕᑦᑐᖕᒐᓂᒃ, ᑭᓇᐅᓂᖕᒋᓐᓂᓪᓗ ᐃᓄᐃᑦ ᓄᓇᓕᖕᒋᓐᓂᒃ ᐊᔾᔨᐅᖖᒋᑦᑐᒃᑯᑦ.
ᑕᒪᑐᒪᓂ ᐊᕐᕌᒍᒥ ᐱᖃᑕᐅᓂᐊᖅᑐᑦ ᐅᑯᐊᖕᒍᓄᑦ:
- ᐊᒡᒍᐊᖅ ᑲᑐᔾᔨᖃᑎᒌᑦ Agguaq Collective — ᓴᖅᑭᑦᑎᓂᖅ ᐃᓄᐃᖕᓂᒃ ᒥᖅᓱᕐᓂᒃᑯᑦ ᐆᒻᒪᕆᒃᑎᐊᒃᑲᓐᓂᓕᖅᑎᑦᑎᓂᕐᒧᑦ ᐱᓕᕆᖃᑎᒌᖕᓂᒃᑯᑦ
- ᐊᓕᐊᓇᐃᑦ ᖁᖖᒋᐊᖅᑎᑦᑎᔩᑦ Alianait Arts Festival — ᐃᓄᐃᑦ ᐃᖖᒋᐅᓯᑐᖃᖕᒋᓐᓂᒃ ᓴᓇᖖᒍᐊᕈᓯᖕᒋᓐᓂᓪᓗ ᐆᒻᒪᖅᑎᑦᑎᒃᑲᓐᓂᕐᓗᑎᒃ ᐊᓕᐊᓇᐃᑦ ᖁᖖᒋᐊᖅᑎᑦᑎᔨᒃᑯᖕᒋᑎᒍᑦ
- ᐋᖅᓯᖅ Artcirq — ᑲᔪᓯᑎᑦᑎᓂᖅ ᓄᓇᒥᒃ-ᑐᖖᒐᕕᓕᖕᓂᒃ ᐃᓕᖅᑯᓯᑐᖃᕐᓄᑦ ᐊᐅᓪᓚᖅᑎᑦᑎᓂᐅᕙᒃᑐᓂᒃ ᐃᓄᖕᓄᑦ ᒪᒃᑯᒃᑐᓄᑦ
- ᓄᓇᑦᑕ ᓱᓇᒃᑯᑖᖕᒋᓐᓂ ᑕᑯᔭᒐᖃᕐᕕᒃ Nunatta Sunakkutaangit Museum — ᐃᑲᔫᑎᒃᓴᑦ ᑕᑯᒃᓴᐅᑎᑕᐅᔪᑦ, ᖃᓄᐃᓕᐅᖅᑎᑦᑎᓂᐅᔪᓂᑦ, ᐊᒻᒪᓗ ᓄᓇᐃᖕᓂ ᐃᓚᐅᑎᑦᑎᓂᖅ
ᑲᑎᖖᒐᔪᑦ ᑲᑎᒪᑎᓪᓗᒋᑦ, ᐅᖃᖃᑎᒌᖕᓂᐅᔪᑦ ᐊᐅᓚᓂᖃᑦᑎᐊᓚᐅᖅᑐᑦ ᖁᕕᐊᓇᖅᑐᑎᓪᓗ ᐱᖃᑕᐅᔪᓪᓗ ᖃᐅᔨᖃᑦᑕᐅᑎᓪᓗᑎᒃ ᐱᓕᕆᐊᖕᒋᓐᓂᒃ ᐊᒻᒪᓗ ᑲᑎᖖᒐᔪᑦ ᐱᔪᓐᓇᕐᓂᖕᒋᑦ ᐋᖅᑭᒃᓱᐃᔾᔪᑕᐅᓪᓗᑎᒃ ᓄᓇᕗᒻᒥ ᓴᓇᖖᒍᐊᖅᑕᐅᕙᒃᑐᓄᑦ ᐊᒻᒪᓗ ᐃᓕᖅᑯᓯᕐᒧᑦ ᓄᓇᒋᔭᖕᒋᓐᓄᑦ. ᐋᒻᐳ ᐊᒡᒍᐊᖅ ᑲᑐᔾᔨᖃᑎᒌᒃᑯᖕᒋᓐᓃᖖᒑᖅᑐᖅ ᐅᖃᓚᐅᖅᑐᖅ, "ᐃᓄᐃᑦ ᐊᔪᖖᒋᑦᑎᐊᕐᓂᖕᒋᑦ ᑲᑎᒃᑕᕌᖕᒐᑕ ᐊᖕᒋᓪᓕᕙᓪᓕᐊᓲᖕᒍᒻᒪᑦ." ᑕᒪᓐᓇ ᐱᔪᒪᓂᖃᕐᓂᖅ ᐃᑎᔫᓚᐅᕐᒪᑦ ᐊᑕᐅᓯᖅ ᐱᖃᑕᐅᔪᖅ ᐱᔪᒪᖕᒪᑦ ᐋᖅᑭᒃᓱᐃᒃᑲᓐᓂᕐᓂᕐᒥᒃ ᐱᓕᕆᐊᕆᔭᒥᓂᒃ ᑮᓇᐅᔭᖃᖅᑎᑕᐅᓂᕐᓗ ᐱᕕᒃᓴᖃᖅᑎᑦᑎᔪᒪᓂᕐᒧᑦ ᐱᓕᕆᖃᑎᒌᖕᓂᕐᒥᒃ ᑕᒪᐃᓐᓂᑦᑎᐊᖅ ᑲᑐᔾᔨᖃᑎᒌᓂᒃ ᐱᓕᕆᖃᑎᒌᒃᑐᓂ.
ᖁᕕᐊᒃᑕᒃᓯᒪᕗᒍᑦ ᐱᓕᕆᖃᑎᒋᔪᓐᓇᕋᑦᑎᒍᑦ ᑖᒃᑯᐊ ᑲᑐᔾᔨᖃᑎᒌᖕᒍᔪᑦ ᑕᐅᑐᖖᒍᐊᖅᑕᒥᓂᒃ ᓴᖅᑭᑎᑦᑎᑎᓪᓗᒋᑦ, ᓂᕆᐅᒃᐳᒍᓪᓗ ᐅᖃᐅᓯᖃᕈᓐᓇᕐᓂᐊᕋᑦᑕ ᐅᓂᒃᑳᓂᒃ ᐊᒃᑐᖅᓯᓂᕆᔭᐅᔪᓂᓪᓗ ᓴᖅᑭᑉᐸᓪᓕᐊᔪᓂᒃ ᑖᒃᑯᓇᖖᒐᑦ ᐱᓕᕆᖃᑎᒌᒃᑐᓂᑦ ᐊᕐᕌᒎᓂᐊᖅᑐᒥ.
