2025/26 ᐊᕐᕌᒍᑕᒫᖅᓯᐅᑦ ᐅᓂᒃᑳᖅ ᐊᑐᐃᓐᓇᐅᓕᖅᑐᖅ

ᑕᒪᑐᒪᓂ ᐊᕐᕌᒍᒥ, ᑕᐅᑐᒐᖃᓪᓗᐊᑕᓚᐅᖅᐳᒍᑦ ᓴᙱᒃᑎᒋᐊᖅᑎᑦᑎᓂᕐᒥᒃ ᐱᓕᕆᖃᑎᒌᒃᐸᖕᓂᕐᒥᒃ, ᑕᑯᕙᒃᖢᑕ ᑲᔪᓯᕙᓪᓕᐊᓂᕆᔭᐅᔪᒥᒃ, ᑕᐅᑐᒃᖢᑕᓗ ᑲᑐᔾᔨᖃᑎᒌᓂᒃ ᐃᑲᔪᖅᑐᐃᕙᒃᑕᑦᑎᓐᓂᒃ ᐱᐅᔪᒻᒪᕆᖕᓂᒃ ᐱᓕᕆᐊᖑᕙᓪᓕᐊᔪᒪᔪᓂᒃ ᓴᖅᑭᑎᑦᑎᕙᓪᓕᐊᑎᓪᓗᒋᑦ ᓄᓇᕘᓕᒫᒥ. ᑐᓂᓯᓚᐅᖅᐳᒍᑦ $1.3 ᒥᓕᐊᓐ ᐅᖓᑖᓂ 19−ᓄᑦ ᓄᓇᓕᖕᓂ−ᐊᐅᓚᑕᐅᔪᓄᑦ ᐱᓕᕆᐊᖑᔪᓄᑦ, 7−ᓄᑦ ᓄᓇᓕᖕᓄᑦ ᑐᕌᑲᐅᑎᒋᓪᓗᑎᒃ.

ᐃᓗᐊᓂ, ᑕᑯᓂᐊᖅᐳᑎᑦ ᐅᓂᒃᑳᓂᒃ ᓴᓇᙳᐊᖃᑎᒌᒃᑐᓂᒃ ᒫᓐᓇᓕᓴᐅᓛᓂᒃ ᓴᓇᙳᐊᖅᑐᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᐱᓕᕆᖃᑎᒌᒃᑐᓂᒃ, ᑮᓇᐅᔭᖁᑎᒋᔭᐅᔪᑦ ᐊᕐᓇᐃᑦ/ᐊᖑᑎᑦ ᓇᓕᒧᒌᒃᑎᑕᐅᓂᖏᓐᓄᑦ ᑲᑎᙵᓂᐅᔪᑦ ᐃᓱᓕᑦᑎᓕᖅᖢᑎᒃ ᒪᕐᕉᖕᓂᒃ ᐊᕐᕌᒎᖕᓂᒃ ᐊᒃᑐᖅᓯᓂᖃᑦᑎᐊᖅᑐᓂᒃ, ᐊᒻᒪᓗ ᐱᓕᕆᖃᑎᒌᑦ ᓵᓚᖃᓚᐅᖅᑐᑦ ᓄᓇᓕᖕᓂ ᓂᕈᐊᒐᒃᓴᙳᖅᑎᑕᐅᔪᓂᒃ ᑐᓐᓂᖅᑯᓯᐊᒥᒃ. ᓄᑖᙳᕆᐊᖅᓯᒪᔪᓂᒃ ᑐᓴᖅᑎᑕᐅᓂᐊᕆᕗᑎᑦ ᐱᕈᔭᖅ ᑮᓇᐅᔭᖁᑎᒋᔭᐅᔪᓂᒃ, ᑕᒪᓐᓇᓗ ᐱᒋᐊᓚᐅᖅᖢᓂ ᑕᒪᑐᒪᓂ ᐊᕐᕌᒍᒥ ᐊᓯᔾᔨᕈᑕᐅᓪᓗᓂ $3 ᒥᓕᐊᓐᓂᒃ ᑐᓐᓂᖅᑯᓯᐊᓂᒃ ᐅᑯᓇᙵᑦ, McConnell Foundation−ᑯᓐᓂ.

ᐱᔾᔪᑕᐅᓪᓗᐊᑕᖅᑐᖅ ᑕᒪᐃᓐᓄᓕᒫᖅ ᐅᓇᐅᕗᖅ, ᑲᑐᐅᔾᔨᓗᑕ ᐱᓕᕆᐊᑦᑎᓐᓂ−ᐊᑕᐅᑦᑎᒃᑯᑦ ᐱᓕᕆᐊᕆᔭᑦᑎᓐᓂ. ᑐᙵᓱᒃᑎᑉᐸᑦᑎᒋᑦ ᖃᐅᔨᒋᐊᖁᓪᓗᑎᑦ ᐊᑕᖏᖅᑐᒥᒃ ᐅᓂᒃᑳᒥᒃ ᐅᓂᒃᑳᖅᑐᐊᓂᒡᓗ ᖃᓄᐃᓕᐅᖅᑐᖃᕈᓐᓇᕐᒪᖔᑦ ᐅᒃᐱᕆᔭᖃᕐᓂᖅ ᓯᕗᒃᑲᖅᑕᖅᑎᐅᓕᖅᐸᑦ.