ᐊᓐᓇᐅᒪ ᑐᑭᒧᐊᑦᑎᑕᐅᕗᖅ ᑐᓂᓯᒪᓪᓚᕆᑦᑐᓄᑦ ᓄᓇᓕᓐᓂ ᐱᓯᒪᔪᓂᑦ ᑲᑎᒪᔨᓄᑦ ᐊᖏᖅᓯᒪᑦᓯᐊᖅᑐᓄᑦ ᓯᕗᒧᐊᑦᑎᑦᓯᓂᕐᒥ ᓄᓇᓕᓐᓂ ᐊᐅᓚᑕᐅᔪᓂᒃ ᖃᓄᐃᓕᐅᕈᑕᐅᔪᓂᒃ ᓄᓇᕗᓕᒫᕐᒥ. ᑲᑎᒪᔨᕗᑦ ᐱᒻᒪᕆᐅᔪᒥᒃ ᐱᓕᕆᐊᖃᖃᑦᑕᖅᑐᑦ ᐋᖅᑭᑦᓱᐃᓪᓗᑎᒃ ᑕᐅᑐᙳᐊᖅᑕᑎᓐᓂᒃ, ᐃᖅᑲᓇᐃᔮᕗᑦ ᒪᓕᒃᑲᓗᐊᕐᒪᖔᑕ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ, ᐊᒻᒪᓗ ᑐᑭᒧᐊᑦᑎᑦᓯᑦᓯᐊᕋᓗᐊᕐᒪᖔᑦᑕ ᑎᒥᖁᑎᕗᑦ ᐃᑲᔪᖅᑐᐃᖁᓗᒋᑦ ᐱᒋᐊᕈᑕᐅᔪᓂᒃ ᓴᙱᓕᖅᐹᓪᓕᕈᑕᐅᓂᐊᖅᑐᓂᒃ ᓄᓇᓕᓐᓄᑦ ᓄᓇᕗᓕᒫᒥ.
ᐊᕐᕌᒍᑕᒫᖅᓯᐅᒻᒥᒃ ᑲᑎᒪᓂᖃᖅᑎᓪᓗᑕ ᐱᒋᐊᕋᑖᕐᓂᖓᓂ ᑕᖅᑭᕆᔭᑦᑕ, ᖁᕕᐊᑦᑐᒻᒪᕆᐅᓚᐅᖅᑐᒍᑦ ᑐᙵᓱᑦᑎᑦᓯᔭᕆᐊᑦᓴᖅ ᓄᑖᕐᓂᒃ ᑲᑎᒻᒪᔨᐅᖃᑕᐅᓂᐊᖅᑐᓂᒃ! ᐱᓕᕆᖃᑦᑕᖅᓯᒪᓂᖏᑦ, ᖃᐅᔨᒪᓂᖏᑦ, ᐊᖏᖅᓯᒪᓂᖏᓪᓗ ᓄᓇᓕᓐᓂᑦ ᖃᓄᐃᙱᑦᓯᐊᕋᓱᐊᕐᓂᕐᒧᑦ ᐊᓐᓇᐅᒪ ᐱᕈᖅᐸᓪᓕᐊᖏᓐᓇᕈᓐᓇᕐᓂᐊᖅᑐᖅ ᐅᑉᐱᕆᔭᐅᑦᓯᐊᕐᓗᓂ ᐱᓕᕆᖃᑎᒋᔭᐅᓗᓂ ᓄᓇᓕᑦᑎᓐᓄᑦ ᓄᓇᕗᓕᒫᕐᒥ. ᑲᑐᔾᔨᓗᑕ, ᓂᕆᐅᓐᓂᖃᑦᓯᐊᖅᑯᒍᑦ ᓴᖅᑭᑦᓯᓂᐊᕐᓂᑦᑎᓐᓂᒃ ᒥᑦᓯᖃᑦᓯᐊᖅᑐᓂᑦ, ᓄᓇᓕᓐᓄᑦ ᐊᐅᓚᑕᐅᔪᓂᑦ ᐊᓯᔾᔨᖅᑐᐃᒍᑎᒋᓗᒋᑦ ᑲᑐᔾᔨᖃᑎᒌᓐᓂᒃᑯᑦ, ᐅᑉᐱᕆᔭᐅᓂᒃᑯᑦ, ᓱᓇᒋᔭᐅᑦᓯᐊᕐᓂᒃᑯᓪᓗ.
ᑐᙵᓱᑦᑎᓚᕗᑦ:
ᒍᐊᓐᑐᓕᓐ ᓇᑦᓯᖅ
ᒍᐃᓐ ᐊᖓᔪᖅᑳᕆᔭᐅᕗᖅ ᑲᓇᑕᓕᒫᒥ ᐃᓄᐃᑦ ᒪᒃᑯᒃᑐᑦ ᑲᑎᒪᔨᖏᓐᓄᑦ, ᑭᒡᒐᖅᑐᐃᕙᒃᑐᓂ ᐃᓄᖕᓂᒃ ᒪᒃᑯᒃᑐᓂᒃ ᐃᓄᐃᑦ ᓄᓇᖓᓂ ᑭᒡᒐᖅᑐᐃᕙᒃᑐᓂᓗ ᒪᒃᑯᒃᑐᓂᒃ ᓄᓇᕐᔪᐊᓕᒫᒥ. ᐃᖃᓗᖕᒥᐅᒃᓴᔭᖅ, ᓄᓇᕗᒻᒥ, ᑲᑎᒪᔨᐅᖃᑕᐅᖏᓐᓇᖅᑐᖅ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᕐᔪᐊᑦ ᑲᓇᑕᒥ, ᖁᙱᐊᖅᑎᐅᖃᑕᐅᓪᓗᓂᓗ ᐃᓄᐃᑦ−ᑯᐃᓐ ᑭᒡᒐᖅᑐᖅᑎᖏᑦ ᐱᓕᕆᖃᑎᒌᑦ ᑲᑎᒪᔨᕋᓛᖏᓐᓄᑦ. ᑕᒪᒃᑯᑎᒎᓇᖅ ᐱᓕᕆᐊᒃᓴᑎᒍᑦ, ᐱᓕᕆᕙᒃᐳᖅ ᓇᓗᙱᑦᑎᐊᕈᒪᓂᕐᒧᑦ ᑕᒪᒃᑯᐊ ᒪᒃᑯᒃᑐᑦ ᓂᐱᖏᑦ ᐱᑕᖃᕋᓗᐊᕐᒪᖔᑕ ᐊᒃᑐᖅᓯᓯᒪᒐᓗᐊᕐᒪᖔᑕᓗ ᐋᖅᑭᒃᓯᒪᓕᖅᑎᑕᐅᔪᓂᒃ ᐋᖅᑭᒃᓯᒪᓕᖅᑎᑦᑎᔪᓂᒃ ᐃᓄᐃᑦ ᓯᕗᓂᒃᓴᖏᓐᓂᒃ.
ᒍᐃᓐ ᒫᓐᓇ ᐃᓕᓐᓂᐊᖅᑐᖅ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐃᓕᓴᐃᔨᐅᓂᕐᒧᑦ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ, ᑕᐃᑲᓂᓗ ᐃᓕᓐᓂᐊᖅᑎᓂᒃ ᑭᒡᒐᖅᑐᐃᔨᐅᓪᓗᓂ ᑲᑎᒪᔨᓄᑦ. ᐱᓕᕆᐊᖃᓪᓚᕆᒍᒪᕙᒃᐳᖅ ᐃᓕᓐᓂᐊᕐᓂᓕᕆᓂᕐᒥᒃ, ᐃᓱᒪᒃᑯᑦ ᖃᓄᐃᙱᑦᑎᐊᕈᓐᓇᕐᓂᕐᒥᒃ, ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒥᒃ, ᐃᓕᖅᑯᓯᑐᖃᕐᓂᒡᓗ ᓴᙱᓂᖅᑖᖅᑎᑦᑎᓂᕐᒥᒃ.
ᐃᓚᖓᑦ ᐱᒻᒪᕆᐅᒋᔭᐅᖃᑕᐅᔪᖅ ᐱᓕᕆᐊᖓᓂ ᐃᓅᖃᑎᒌᑦᑎᐊᕐᓂᖅ, ᐃᓄᐃᑦ ᖃᐅᔨᒪᔭᑐᖃᖏᑕ ᑐᙵᕕᖏᑦ ᓇᓗᓇᐃᖅᓯᓪᓗᓂ ᐱᒻᒪᕆᐅᓂᖓᓂᒃ ᐃᒃᐱᒍᓱᑦᑎᐊᕐᓂᖅ, ᐃᓅᖃᑎᒌᖕᓂᖅ, ᐊᒻᒪ ᓄᓇᖅᑲᑎᒌᑦ ᒪᒃᑯᒃᑐᑦ ᖃᓄᐃᙱᑦᑎᐊᖁᓪᓗᒋᑦ. ᐅᒃᐱᕈᓱᒃᐳᖅ ᐃᑲᔪᖃᑦᑕᐅᑎᓂᒃᑯᑦ, ᒪᒃᑯᒃᑐᑦ ᓯᕗᓕᖅᑎᑦ ᐱᔪᓐᓇᕐᓂᖅᑖᖅᑎᑉᐸᒡᓗᒋᑦ, ᒪᒃᑯᒃᑐᑦ ᓂᐱᖏᑦ ᐱᕕᖃᖅᑎᑉᐸᒡᓗᒋᑦ, ᐃᓄᖕᓂᑦ ᓴᙱᒃᑎᒋᐊᖅᑎᑦᑎᑐᐃᓐᓇᖃᑦᑕᙱᓐᓇᑦᑕ−ᓴᖅᑭᑦᑎᓲᖑᕗᒍᑦ ᐱᐅᓂᖅᓴᒥᒃ ᓯᕗᓂᒃᓴᖃᕐᓂᕐᒥᒃ ᐃᓄᓕᒫᓄᑦ.
ᐋᑕᒥ ᐃᑦᑐᐊᑦᓯᐊᖅ
ᐃᖃᓗᖕᓂ ᐃᓅᓂᑯ ᐱᕈᖅᓴᓯᒪᓪᓗᓂᓗ, ᐋᑕᒥ ᐃᖅᑲᓇᐃᔮᖃᖃᑦᑕᖅᓯᒪᕗᖅ ᐱᔨᑦᑎᕋᕈᒪᑦᓯᐊᖅᓱᓂ ᐃᓄᐃᑦ ᓄᓇᓕᖏᓐᓂᒃ ᐃᓅᓯᓕᒫᕐᒥᓂᒡᓗ ᐊᒃᑐᐊᓂᖃᐃᓐᓇᖅᓱᓂ ᓄᓇᕗᒻᒧᑦ. ᓂᕈᐊᖅᑕᐅᓚᐅᖅᓯᒪᔪᖅ ᓯᕗᓕᖅᑎᐅᖁᔭᐅᓪᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ, ᐃᓚᒋᔭᐅᓪᓗᓂ ᑎᑎᕋᖅᑎ ᑮᓇᐅᔭᓕᕆᓂᕐᒧᑦ, ᑲᑎᒪᑎᑦᑎᔨ ᐃᓄᐃᑦ ᐱᓕᕆᐊᒃᓴᖏᓐᓄᑦ ᐱᔨᑦᑎᕋᐅᑎᖏᓐᓄᓪᓗ, ᐊᒻᒪ ᑲᑭᕙᒃ ᑲᑐᔾᔨᖃᑎᒌᓄᑦ.
ᐃᖅᑲᓇᐃᔭᓚᐅᖅᑳᕋᓂ ᐃᓄᐃᑦ ᒐᕙᒪᓕᕆᓂᕐᒧᑦ ᐊᒻᒪ ᓄᓇᓕᖕᓂ ᐱᕙᓪᓕᐊᑎᑦᑎᓂᕐᒧᑦ, ᐱᕚᓪᓕᖅᑎᑦᑎᓚᐅᖅᐳᖅ ᐱᓕᕆᔨᒻᒪᕆᐅᓂᕐᒧᑦ ᐱᓕᕆᖃᑦᑕᖅᓯᒪᓂᑰᓪᓗᓂ ᑐᓴᐅᒪᔪᓕᕆᓂᕐᒥᒃ ᐊᒻᒪ ᐱᓕᕆᔾᔪᑎᓂᒃ, ᖃᖓᑕᓲᓕᕆᓂᕐᒥᒃ, ᐊᒻᒪ ᐃᖃᓗᓕᕆᓂᕐᒥᒃ. ᓇᖕᒥᓂᖃᖅᑎᐅᑦᑎᐊᖅᓱᓂ, 'ᐊᐅᓪᓚᖅᓯᒪᐃᓐᓇᐅᔭᖅᑐᖅ' ᑕᐃᒪᙵᓂᒃ ᐅᑭᐅᖃᓕᖅᓱᓂ 16−ᓂᒃ, ᐃᖅᑲᓇᐃᔮᒥᓂᒃ ᐱᒋᐊᓕᓚᐅᖅᓯᒪᓪᓗᓂ ᐅᖄᓚᐅᓯᕆᔨᒃᑯᑦ ᐱᐊᓪᑯᓐᓄᑦ (Bell) ᐊᒻᒪ ᑲᔪᓯᑎᑦᑎᓪᓗᓂ ᐱᔪᒪᓂᖃᑦᑎᐊᕐᓂᕐᒥᒃ ᐊᒻᒪ ᓱᖏᐅᑎᔪᓐᓇᕐᓂᕐᒥᒃ ᐱᓕᕆᐊᒃᓴᓕᒫᖏᓐᓄᑦ ᐱᔨᑦᑎᕋᖅᓱᓂ ᓄᓇᓕᖕᓂ.
ᐃᖅᑲᓇᐃᔭᕐᓇᐅᙱᑎᓪᓗᒍ, ᐋᑕᒥ ᖁᕕᐊᓱᖕᓂᖅᐹᖑᕗᖅ ᐊᖑᓇᓱᓕᕌᖓᒥ, ᓄᓇᒦᓪᓗᓂ ᑕᕆᐅᕐᒦᓪᓗᓂᓗ, ᐊᒻᒪᓗ, ᐱᓗᐊᖅᑐᒥᒃ, ᐃᓚᒥᓃᓪᓗᓂ ᓇᖕᒥᓂᖏᓐᓂᑦ. ᐃᒻᒥᓂᒃ−ᐅᖃᖅᓱᓂ "ᐃᕐᖑᑕᖏᓐᓂ ᓇᒡᓕᒍᓱᒃᑐᒻᒪᕆᐊᓗᒃ," ᐱᒃᑯᒋᑦᑎᐊᖅᐸᒃᑐᓂᒋᑦ ᖃᖓᓕᒫᑦᑎᐊᖅ. ᑲᑎᖃᑎᒋᔪᓐᓇᕈᕕᐅᒃ, ᓇᓂᓇᔭᖅᑕᒃᓴᕆᔭᐃᑦ ᑳᐱᑐᕐᓗᓂ ᑎᒍᒥᐊᕐᓗᓂ, ᑲᑎᖃᑎᖃᑐᐃᓐᓇᕆᐊᖃᓕᕐᓗᓂ, ᐅᓂᒃᑳᕆᐊᖅᑐᕐᓗᓂ, ᐅᕝᕙᓘᓐᓃᑦ ᐃᓕᖕᓂᒃ ᐱᓕᕆᖃᑎᖃᓕᕐᓗᓂ.
ᑳᓖᓐ ᐋᕆᐊᖅ
ᑳᓖᓐ ᐋᕆᐊᒃ ᑭᒡᒐᖅᑐᐃᔨᐅᓪᓚᕆᒃᐳᖅ ᐃᓄᐃᑦ ᐅᖃᐅᓯᖏᓐᓄᑦ ᐱᔪᓐᓇᐅᑎᒋᔭᐅᔪᓄᑦ ᐅᖃᐅᓯᕐᓄᑦ ᑲᒥᓯᓇᒋᔭᐅᓚᐅᖅᓱᓂᓗ ᓄᓇᕗᒻᒧᑦ, ᐃᓂᒋᓕᓚᐅᖅᓯᒪᔭᖓ ᕕᕗᐊᕆ 2020−ᒥ ᑎᒃᑯᐊᖅᑕᐅᕌᓪᓚᓚᐅᖅᓱᓂ ᑲᒥᓯᓇᐅᓚᐅᑲᖕᓂᐊᕐᓗᓂ ᐅᑐᐱᕆ 2019−ᒥ.
ᑳᓖᓐ ᓇᒃᓴᖅᐳᖅ ᐱᐅᔪᒻᒪᕆᖕᒥᒃ ᐊᔾᔨᒌᙱᕈᓘᔭᖅᑐᒥᒡᓗ ᐱᓕᕆᖃᑦᑕᖅᓯᒪᓂᑰᓪᓗᓂ 30 ᐊᕐᕌᒍᐃᑦ ᐅᖓᑖᓄᑦ ᐱᓕᕆᖃᑦᑕᖅᓯᒪᓂᑰᓪᓗᓂ ᐱᕙᓪᓕᐊᔪᓕᕆᓂᕐᒥᒃ ᐱᕙᓪᓕᐊᔪᓕᕆᓂᕐᒥᒡᓗ. ᐃᖅᑲᓇᐃᔭᖃᑦᑕᖅᓯᒪᔪᖅ ᐱᕙᓪᓕᐊᔪᓕᕆᔨᐅᓪᓗᓂ, ᐋᖅᑭᒃᓱᐃᔨᐅᓪᓗᓂ, ᓴᖅᑭᑎᑦᑎᔨᐅᓪᓗᓂ, ᐊᒻᒪ ᐅᖃᖅᑎᐅᓪᓗᓂ ᑕᒪᐃᓐᓄᑦ ᓈᓚᐅᑎᒃᑯᑦ ᐊᒻᒪ ᑕᓚᕖᓴᒃᑯᑦ, ᐱᓕᕆᖃᑎᖃᖅᐸᒃᑐᓂ ᖃᔅᓯᑲᓪᓚᖕᓂᒃ ᓈᓚᐅᑎᓕᕆᔨᓂᒃ. ᐃᑲᔪᕐᔪᐊᖅᓯᒪᖕᒥᔪᖅ ᑕᕐᕆᔭᐅᓯᐅᖅᑕᐅᔪᓂᒃ ᑕᒪᐃᓐᓂᒃ ᐃᓄᒃᑐᑦ ᖃᓪᓗᓈᑎᑐᓪᓗ.
ᐃᓕᓴᕆᔭᐅᓯᒪᕐᔪᐊᖅᑐᖅ ᐱᓕᕆᖃᑦᑕᖅᓯᒪᓂᖓᓄᑦ ᐊᐅᓚᑦᑎᓂᕐᓂᒃ, ᖃᓄᐃᓕᐅᕐᓂᐅᔪᓂᒃ ᓄᓇᓕᖕᓂ, ᐊᕕᒃᑐᖅᓯᒪᔪᓂ, ᑲᓇᑕᒥ, ᐊᒻᒪ ᓄᓇᕐᔪᐊᓕᒫᒥ−ᓈᓚᐅᑎᒃᑯᑦ ᐱᕙᓪᓕᐊᔪᑎᒍᑦ ᐅᕝᕙᓘᓐᓃᑦ ᑭᒃᑯᑐᐃᓐᓇᓂᒃ ᐊᒻᒪ ᐃᓛᒃᑰᖅᑐᓂᒃ ᑲᑎᙵᔪᓂᒃ.
ᑳᓖᓐ ᑭᒡᒐᖅᑐᐃᔨᐅᓪᓚᕆᒃᐳᖅ ᓴᐳᔾᔨᓯᒪᓂᕐᒧᑦ, ᐆᒻᒪᕆᐊᖅᑎᑦᑎᓂᕐᒧᑦ, ᖃᐅᑕᒫᓪᓗ ᐊᑐᖅᑕᐅᕙᖕᓂᖓᓄᑦ ᐃᓄᐃᑦ ᐅᖃᐅᓯᖏᓐᓂᒃ ᐃᓄᐃᑦ ᓄᓇᖓᓂ, ᐱᔾᔪᑎᖃᓗᐊᖅᓱᓂ ᓄᓇᒋᔭᒥᓂᒃ ᐊᕕᒃᓯᒪᓂᕆᔭᐅᔪᒥ ᓄᓇᕗᒻᒥ. ᑐᙵᕕᖃᖅᓱᓂ ᓴᙱᔪᒥᒃ ᖃᑕᙳᑎᒌᓄᑦ ᐱᐅᓯᕆᔭᐅᕙᓚᐅᖅᑐᓂᒃ, ᑲᑎᑎᑦᑎᕙᒃᐳᖅ ᐱᓕᕆᖃᑦᑕᖅᓯᒪᓂᑰᓂᕐᒥᓂᒃ ᐱᕙᓪᓕᐊᔪᓕᕆᓂᕐᒥᒃ, ᑕᕐᕆᔭᐅᓯᐅᕐᓂᕐᒥᒃ, ᐊᑐᐊᒐᓕᐅᖅᐸᓪᓕᐊᓂᕐᒥᒃ, ᐊᐅᓚᑦᑎᓂᕐᒥᒃ, ᒪᓕᒐᓕᕆᓂᕐᒥᒡᓗ ᐅᓇᑕᖅᑎᑦᑎᔪᒪᓪᓗᓂ ᐅᖃᐅᓯᕐᒥᒃ ᐊᓯᐅᔨᕙᓪᓕᐊᓂᕐᒥᒃ ᐅᔾᔨᕐᓇᖅᓯᑎᑦᑎᔪᒪᓪᓗᓂᓗ ᐃᓕᖅᑯᓯᑐᖃᕐᒥᒃ ᔭᒐᑎᑦᑎᑦᑕᐃᓕᒪᓂᕐᒥᒃ, ᐅᔾᔨᕐᓇᖅᑐᒻᒪᕆᖕᒥᒃ ᐊᒃᑐᖅᓯᓯᒪᓪᓗᓂ ᓄᓇᓕᒋᔭᒥᓂ ᐅᖓᑖᓄᓪᓗ.
