ᐃᓱᒪᔅᓴᕐᓯᐅᖁᔨᕗᒍᑦ ᐃᓚᒋᓕᐅᔾᔨᖁᓪᓗᓯ ᐊᓐᓇᐅᒪᒃᑲᐃᔨᓂᑦ ᕿᒪᒃᑲᑯᒋᓛᖅᑕᓯᓐᓄᑦ ᑐᓂᔭᐅᖃᓯᐅᑎᓛᖁᓪᓗᒋᑦ, ᑕᐃᒫᒃ ᑲᑐᔾᔨᖃᑕᐅᒍᓐᓇᓛᕋᕕᑦ ᓱᓕ ᐃᖅᑲᓇᐃᔮᑦᑎᓐᓂᒃ ᓯᕗᓂᔅᓴᑎᓐᓄᑦ ᐱᕙᓪᓕᐊᑎᓪᓗᑕ. ᖃᐅᔨᒪᑦᑎᐊᕈᒪᒐᑦᑕ ᐃᑲᔪᑦᑎᐊᖃᑦᑕᕐᓃᑦ ᐱᕙᓪᓕᐅᑎᑎᑦᑎᒍᓐᓇᕐᓂᖓᓂᒃ ᐊᕐᕌᒍᒐᓴᓐᓂᑦ ᓯᕗᓂᔅᓴᑎᓐᓂ. 

ᐊᓐᓇᐅᒪᑲᐃᔩᑦ ᐃᖅᑲᓇᐃᔮᖏᑦ ᑐᙵᕕᓖᑦ ᐃᑉᐱᒍᓱᑦᑎᐊᓂᕐᒥᒃ: ᐃᑉᐱᒋᖃᑦᑕᐅᑎᑦᑎᐊᖅᑐᑎᒃ; ᑲᒪᑦᑎᐊᖅᑐᑎᒃ ᓄᓇᒥᓂᒃ, ᐃᒪᖓᓂᒃ ᓯᓚᖓᓂᓪᓗ; ᐊᒻᒪᓗ ᑲᒪᑦᑎᐊᖅᑐᑎᒃ ᐅᕙᒍᑦ ᐃᓅᓪᓗᑕ ᐃᓕᖅᑯᓯᑦᑎᓐᓂᒃ ᐅᖃᐅᓯᑦᑎᓂᓪᓗ ᑕᒪᓐᓇ ᐃᓚᒋᔭᐅᒻᒪᑦ ᐃᓅᓯᑦᑎᓐᓄᑦ. ᐃᑉᐱᒍᓱᑦᑎᐊᖅᑐᑦ ᐃᑲᔪᖅᑏᑦ ᑲᑐᔾᔨᖃᑎᒋᒐᑦᑎᒍ ᑕᒪᑐᒥᖓ ᐃᖅᑲᓇᐃᔮᑦᑎᓐᓂᒃ. ᓂᕆᐅᑉᐳᒍᑦ ᐃᓚᖃᖃᑦᑕᕐᓂᐊᕆᐊᔅᓴᖅ ᐃᑲᔪᖅᑎᒋᕙᑦᑕᑎᓐᓂᒃ ᓈᓚᑦᑎᐊᐸᑦᑐᓂᑦ, ᐊᖏᕐᓯᒪᔪᓂᑦ ᓄᑖᓄᑦ ᐱᐅᓯᕆᔭᐅᖃᑦᑕᓂᐊᖅᑐᓄᑦ; ᐊᒻᒪᓗ ᑕᑯᓐᓈᖅᑐᓂᑦ ᑕᒪᑐᒥᖓ ᑲᑐᔾᔨᖃᑎᒌᓐᓂᕐᒥᒃ ᐱᕕᖃᕈᑕᐅᓪᓗᒍ ᐃᓕᓐᓂᐊᓂᕐᒧᑦ ᐊᒻᒪᓗ ᐃᑲᔫᑎᓕᒻᒥᒃ ᐊᔾᔨᐅᖏᑦᑐᒥᒃ ᐃᓄᓐᓄᑦ−ᑐᑭᒧᐊᑦᑎᑕᐅᔪᒥᒃ ᐱᓇᓱᐊᕈᑕᐅᔪᒥᒃ ᐃᑲᔪᖃᑦᑕᓂᕐᒥᒃ ᐃᓅᖃᑎᖏᓐᓂᒃ. ᐃᑲᔪᖅᑕᐅᓗᑕ ᓲᕐᓗ ᐃᓕᔅᓯᓐᓂᑎᑐᑦ, ᐋᖅᑭᔅᓱᐃᔪᒪᓂᖃᕋᓗᐊᖅᑯᒍᑦ ᐊᑑᑎᓕᓐᓂᑦ ᐃᑲᔪᕐᓗᑕ ᑲᒪᒋᔭᖃᕐᓂᕐᒥᒃ ᑕᒪᒃᑯᓂᖓ ᓄᓇᓕᓐᓂᑦ−ᓇᓗᓇᐃᖅᑕᐅᓯᒪᔪᓂᑦ ᓯᕗᓪᓕᐅᔾᔭᐅᖁᔭᐅᓯᒪᔪᓂᑦ ᐊᕐᕌᒍᒐᓴᓐᓂᑦ ᓯᕗᓂᔅᓴᑎᓐᓂ.

ᖃᓄᖅ ᑐᓂᔭᔅᓴᕋ ᓇᓗᓇᐃᕐᓯᒪᒐᔭᕋᒃᑯ ᐃᓅᒍᓐᓃᕈᒪ ᑐᓂᔭᐅᓛᖁᔭᖏᓐᓂᒃ ᐅᕙᖓ?

ᐱᔾᔪᑎᒋᓪᓗᒍ ᖃᐅᔨᒪᔭᐅᖁᒍᕕᒋᑦ ᐊᓐᓇᐅᒪᒃᑲᐃᔩᑦ ᐃᓅᒍᓐᓃᕈᕕᑦ ᐃᕝᕕᑦ ᑐᓂᔭᐅᓛᖁᔭᖏᓐᓂᒃ, ᐊᑎᓕᒫᖓ ᒪᓕᒐᖅᑎᒍᑦ ᑕᐃᔭᐅᔾᔪᓯᖓ ᐅᓇ “Annaumakkaijiit Community Foundation” ᐊᒻᒪᓗ ᐃᑲᔫᓯᐊᖅᑖᕈᓐᓇᐅᑎᖓᑕ ᓈᓴᐅᑖ ᐅᓇᐅᓪᓗᓂ 72255 5331 RR0001.

ᒪᕐᕉᒻᒪᑎᒃ ᐊᑐᖅᑕᐅᒐᔪᑦᑑᒃ ᐃᖅᑲᐅᒪᑦᑎᔾᔪᑎᔅᓵᒃ ᐊᓐᓇᐅᒪ ᓄᓇᓕᓐᓂᑦ ᑐᙵᕕᒻᒥᑦ ᐃᕝᕕᑦ ᑐᓂᔭᐅᓛᖁᔭᖏᓐᓂᒃ ᐃᓅᒍᓐᓃᕈᕕᑦ:

1. ᐊᒥᐊᒃᑯᖏᑦ ᐊᓯᓕᒫᖏᑦ ᐊᑭᓕᖅᑕᐅᓚᐅᖅᑎᓪᓗᒋᑦ ᐊᑭᓕᕆᐊᓕᒥᓃᑦ − ᖃᓄᑎᒋ ᐊᒥᓲᑎᒋᔪᓂᑦ ᐳᓴᓐᑎᑎᒍᑦ ᓇᓗᓇᐃᕐᓯᓯᒪᓗᑎᑦ ᐃᕝᕕᑦ ᑐᓂᔭᐅᓛᖁᔭᖏᓐᓂᒃ ᐊᑭᓕᔅᓴᓕᒫᑎᑦ, ᐊᑭᓕᕐᓱᕆᐊᓕᓕᒫᑦ ᐊᒻᒪᓗ ᐊᓯᖏᑦ ᑐᓂᔭᐅᖁᓯᒪᔭᑎᑦ ᑐᓂᔭᐅᓚᐅᖅᑎᓪᓗᒋᑦ.

2. ᓇᓗᓇᐃᕐᓯᓯᒪᑦᑎᐊᕐᓗᑎᑦ ᑐᓂᔭᐅᖁᒐᔭᖅᑕᕐᓂᒃ − ᓇᓗᓇᐃᕐᓯᓯᒪᓗᑎᑦ ᖃᑦᑎᓂᑦ ᑮᓇᐅᔭᓂᑦ ᑐᓂᔭᐅᖁᔨᒻᒪᖔᕐᐱᑦ ᐊᓐᓇᐅᒪᒃᑲᐃᔨᓄᑦ.

ᑎᑎᖅᑲᓂᑦ ᑐᑭᓯᓯᒪᔾᔪᑎᔅᓴᓂᑦ ᐱᔪᒪᒍᕕᑦ ᖃᓄᖅ ᑐᓂᔭᔅᓴᓂᑦ ᕿᒪᐃᕕᔅᓴᐅᒻᒪᖔᖅ ᐊᓐᓇᐅᒪᒃᑲᐃᔨᓄᑦ ᐃᕝᕕᑦ ᑐᓂᔭᐅᓛᖁᔭᖏᓐᓂᒃ ᐃᓅᒍᓐᓃᕈᕕᑦ, ᑎᑎᕋᕐᕕᒋᓗᒍ ᐅᓇ info@annauma.ca. ᑐᑭᓯᔪᒍᑦ ᑕᐃᒫᒃ ᐃᓱᒪᒋᙳᐊᑕᕐᓯᓇᖅᑕᐃᑦ ᐊᑯᓂ ᑲᒪᒋᔅᓲᔭᕆᐊᖃᕐᓂᐊᑐᔅᓴᐅᒻᒪᑦ ᐊᒻᒪᓗ ᐃᓱᒪᔅᓴᕐᓯᐅᕈᑕᐅᔭᕆᐊᖃᕋᔭᖅᑐᓂᓗ. ᖁᔭᓕᕗᒍᑦ ᐅᕙᑦᑎᓐᓂᒃ ᑕᐃᒫᒃ ᑕᑎᖃᙳᐊᑕᕐᓯᓐᓇᕋᕕᑦ ᐊᒻᒪᓗ ᐱᓕᕆᓂᐊᖅᑐᒍᑦ ᑲᔪᓯᑎᑦᑎᓗᑕ ᐃᑲᔫᓯᐊᖅᑖᕆᐊᓕᓐᓄᑦ ᐸᐸᑦᑎᓂᕐᒥᒃ.

ᐆᑦᑑᑏᑦ ᑎᑎᕋᕐᓯᒪᓂᕆᔪᓐᓇᖅᑕᖏᑦ ᐃᕝᕕᑦ ᑐᓂᔭᔅᓴᖏᓐᓂᒃ ᐃᓅᒍᓐᓃᕈᕕᑦ:

• ᕿᒪᐃᓂᕐᒧᑦ ᐊᒥᐊᒃᑯᖏᓐᓂᒃ ᐊᑭᓕᖅᑕᐅᓚᐅᖅᑎᓪᓗᒋᑦ ᐊᑭᓕᕆᐊᓕᒥᓃᑦ: “ᑐᓂᓯᕗᖓ ᐊᓐᓇᐅᒪ ᓄᓇᓕᓐᓂᑦ ᑐᙵᕕᒻᒧᑦ” (ᐃᑲᔫᓯᐊᖅᑖᕈᓐᓇᓂᕐᒧᑦ ᑎᑎᕋᖅᑕᐅᓯᒪᓂᖓ # 72255 5331 RR0001), ᐅᕝᕙᓘᓐᓃᑦ ᑭᖑᕝᕕᖅᑎᒋᓂᐊᖅᑕᖏᓐᓄᑦ, xx% ᐊᒥᐊᒃᑯᖏᑦ ᐊᓯᓕᒫᖏᑦ ᑲᒪᒋᔭᐅᓚᐅᖅᑎᓪᓗᒋᑦ ᕿᒪᑦᑕᓐᓂᒃ.”

• ᕿᒪᐃᓂᕐᒧᑦ ᓇᓗᓇᐃᕐᓯᓯᒪᑦᑎᐊᕐᓗᑎᑦ ᑐᓂᒐᔭᖅᑕᕐᓂᒃ: “ᑐᓂᓯᕗᖓ ᐊᓐᓇᐅᒪ ᓄᓇᓕᓐᓂᑦ ᑐᙵᕕᒻᒧᑦ (ᐃᑲᔫᓯᐊᖅᑖᕈᓐᓇᓂᕐᒧᑦ ᑎᑎᕋᖅᑕᐅᓯᒪᓂᖓ # 72255 5331 RR0001), ᐅᕝᕙᓘᓐᓃᑦ ᑭᖑᕝᕕᖅᑎᒋᓂᐊᖅᑕᖏᓐᓄᑦ, ᐊᒥᓲᓂᓕᓐᓂᑦ ᑮᓇᐅᔭᓂᑦ ᐃᒪᓐᓇᓂᑦ $xxxxx.”

ᖃᐅᔨᒪᔭᐅᔭᕆᐊᖃᙱᓐᓂᖏᑦ ᐊᒻᒪᓗ ᑕᑯᔭᐅᔭᕆᐊᖃᙱᓐᓂᖏᑦ

ᐊᒥᓲᓂᖏᑦ ᐊᒻᒪᓗ ᐱᔾᔪᑎᒋᓪᓗᒍ ᑐᓂᔭᑎᑦ ᖃᐅᔨᒪᔭᐅᔭᕆᐊᖃᙱᓪᓚᕆᑉᐳᑦ ᐊᒻᒪᓗ ᓴᖅᑭᖅᑕᐅᔾᔮᒐᑎᒃ ᐃᓄᓕᒫᓄᑦ ᓇᓗᓇᐃᕐᓯᓯᒪᑎᓐᓇᑎᑦ ᑕᑯᔭᐅᔪᓐᓇᕋᔭᕆᐊᔅᓴᖏᓐᓂᒃ. 

ᐃᓅᔪᓐᓃᖅᑐᒧᑦ ᑐᓂᔭᔅᓴᐃᑦ ᒪᓕᒐᖅᑎᒍᑦ ᑎᑎᖅᑲᐅᒻᒪᑕ. ᑎᓕᐅᕆᕗᒍᑦ ᐃᓕᓐᓂᒃ ᒪᓕᒐᖅᑎᑦ ᑐᑭᓯᒋᐊᖁᓪᓗᑎᑦ ᐃᕝᕕᑦ ᕿᒪᒍᒫᖅᑕᖏᓐᓄᑦ ᐸᕐᓇᐃᓂᕐᒧᑦ ᐅᖃᐅᔾᔭᐅᒋᐊᕈᓐᓇᖁᓪᓗᑎᑦ ᖃᐅᔨᒪᑦᑎᐊᖅᑐᒧᑦ ᑕᒪᑐᒥᖓ ᐃᕝᕕᑦ ᑐᓂᔭᐅᓛᖁᔭᖏᓐᓂᒃ ᑎᑎᕋᕈᒪᓂᐊᕈᕕᑦ ᐅᕝᕙᓘᓐᓃᑦ ᐊᓯᔾᔩᔪᒪᓂᐊᕈᕕᑦ ᐃᕝᕕᑦ ᑐᓂᔭᐅᓛᖁᔭᖏᓐᓂᒃ. ᐊᓐᓇᐅᒪ ᖁᕕᐊᓱᑉᐳᑦ ᐃᓕᓐᓂᒃ ᐅᖃᖃᑎᖃᕋᔭᕆᐊᔅᓴᖅ ᒪᓕᒐᓕᕆᔨᓐᓂᓪᓗ ᐃᑲᔪᕐᓗᑎᒃ ᑎᑎᕋᕐᓂᕐᒥᒃ ᐃᕝᕕᑦ ᑐᓂᔭᐅᓛᖁᔭᖏᓐᓂᒃ ᑎᑎᕋᕐᓯᒪᓂᐅᓂᐊᖅᑐᓂᑦ. ᐃᓘᓐᓇᑎᒃ ᑐᓴᐅᒪᖃᑦᑕᐅᑎᒍᑎᐅᔪᑦ ᑲᙳᓇᖅᑑᓗᑎᒃ ᑕᑯᔭᐅᔭᕆᐊᖃᙱᓪᓗᑎᒃ ᑕᐃᒫᒃ ᐱᓯᒪᔭᐅᓂᐊᖅᑐᑦ.