ᑐᑭᓯᒋᐊᕐᕕᒃ: ᓇᒦᕝᕕᐅᔪᖅ ᓇᓂᓯᕕᔅᓴᐅᔪᖅᑐᑭᓯᓂᕐᒧᑦ
ᐊᐱᐱᕆᒍᒍᕕᑦ ᑭᓇᑐᐃᓐᓇᕐᒥᑦ ᖃᓄᖅ ᓄᓇᓕᐅᔪᖅ ᑐᑭᖃᕐᒪᖔᖅ, ᐊᔾᔨᐅᖏᑦᑐᒥᑦ ᑭᐅᔭᐅᔪᓐᓇᖅᑐᑎᑦ ᑭᓇᑐᐃᓐᓇᕐᒧᑦ ᐃᓱᒪᒋᔭᖓᓂ. ᐃᓚᖏᓐᓄᑦ, ᓄᓇᐅᔪᖅ ᓄᓇᒋᔭᖏᓐᓂ, ᐅᕝᕙᓘᓐᓃᑦ ᐃᓅᖃᑎᒌᓐᓂᕐᒧᑦ ᑎᒥᐅᔪᑦ ᐃᓚᒋᓕᖅᓯᒪᔭᖏᑦ. ᐊᓯᖏᓐᓄᑦ, ᐱᖅᑯᓯᐅᔪᑦ, ᐃᓚᒌᑦ ᐊᒻᒪ ᐱᖃᓐᓇᕇᑦ ᐃᓚᒋᖃᑦᑕᖅᑕᖏᑦ. ᓂᐊᔅᓕᐊᑦ ᐆᒻᒪᑎᖓᓃᑦᑐᖅ ᐃᖃᓗᓐᓂ ᑐᑭᖃᖅᑐᖅ ᑐᑭᓯᒋᐊᕐᕕᒃ, ᑐᓐᖓᕕᐅᔪᓐᓇᖅᑐᖅ ᓄᓇᓕᒻᒧᑦ ᑖᒃᑯᓄᖓᓕᒫᖅ ᑐᑭᖏᓐᓄᑦ ᐊᒻᒪ ᐊᒥᓲᓂᖅᓴᓄᑦ.
ᑐᑭᓯᒋᐊᕐᕕᒨᖅᑐᓂ, ᑐᓐᖓᓱᑦᑎᑕᐅᔪᑎᑦ ᖁᖓᑦᑎᐊᖅᑐᒧᑦ ᐊᒻᒪ ᑳᐱᖁᔨᓪᓗᓂ, ᑏ, ᐊᒻᒪ ᐸᓚᐅᒑᕐᒥᑦ. ᐃᓂᐅᔪᖅ ᐆᒪᓂᖃᑦᑎᐊᖅᑐᖅ ᐅᖃᖃᑎᒌᓪᓗᓂ ᓂᕿᓕᐅᕐᕕᒻᒥ ᐃᖅᑲᓇᐃᔭᖅᑏᑦ ᓂᕿᓕᐅᖅᑎᓪᓗᒋᑦ ᐳᓛᖅᑎᓄᑦ. ᓱᓇᒃᑯᑖᑦ ᓴᓇᓂᕐᒧᑦ, ᓲᕐᓗ ᓴᐸᖓᐃᑦ, ᓇᑦᑎᕋᔭ.ᐃᑦ, ᐊᒥᕋᔭᐃᑦ ᐊᒻᒪ ᓴᓇᕐᕈᑏᑦ,, ᐋᖅᑭᓱᖅᓯᒪᑦᑎᐊᖅᑐᑦ ᐊᒻᒪ ᖁᓕᕇᑦᑐᑎ ᐊᕙᓗᒥ, ᐊᑐᐃᓐᓇᐅᔪᑦ ᐊᒻᒪ ᐅᑕᖅᑭᓪᓗᑎ. ᐊᔾᔨᓐᖑᐊᑦ ᐱᓕᕆᐊᒧ ᐃᓚᒋᔭᐅᖃᑕᐅᔪᓄᑦ, ᐱᒋᐊᖅᑐᑎ ᖁᖓᑦᑐᓂᑦ ᐃᖃᓗᒻᒥ ᑎᒍᒥᐊᖅᑐᑦ ᐱᖃᑎᒋᓪᓗᒋᑦ ᐃᓐᓇᑐᖃᐃᑦ, ᑎᑭᑦᑐᒍ ᐊᕐᓇᓄᑦ ᒥᖅᓱᖅᑐᑦ ᑲᒥᓕᐅᖅᑐᑎ, ᓂᕿᓕᐅᖅᑐᑦ ᐃᓄᐃᑦ ᓂᕿᖏᓐᓂ, ᐊᒻᒪ ᐃᓪᓚᖃᑎᒌᑦᑐᑦ ᐱᐅᒋᔭᐅᔪᑦ ᐊᕙᓗᒦᑦᑐᑦ.
ᐅᖓᑖᓂ 20 ᐊᕐᕌᒍᓂᑦ, ᑐᑭᓯᒋᐊᕐᕕᒃ ᐱᔨᑦᑎᖅᓯᒪᔪᖅ ᐊᑦᑕᓇᖏᑦᑐᒥ ᐃᓂᐅᓪᓗᓂ ᐃᖃᓗᒻᒥᐅᑕᓄᑦ, ᐃᑲᔪᖃᑦᑕᖅᑐᑎ ᐊᒻᒪ ᐱᕈᖅᑎᑎᓪᓗᑎ ᐅᐱᒍᓱᖃᓂᕐᒥᑦ ᐃᓄᐃᑦ ᐱᖅᑯᓯᖏᓐᓂ. ᑐᑭᓯᒋᐊᕐᕕᒃ ᑐᑭᖃᖅᑐᖅ "ᓇᒦᕝᕕᐅᔪᖅ ᓇᓂᓯᕕᔅᓴᐅᔪᖅ ᑐᑭᓯᓂᕐᒧᑦ", ᐊᒻᒪ ᐃᓱᒪᒋᔭᐅᔪᓕᒫᑦ ᐱᓕᕆᕕᒻᒥ ᓇᓗᓴᐃᖅᓯᓂᖃᖅᑐᖅ ᑕᑯᓐᓇᖅᑕᐅᔪᓂᑦ.
ᐃᑲᔪᕐᓂᐊᕐᓗᓂ ᓄᓇᓕᒻᒧᑦ ᐱᔭᐅᔭᕆᐊᓖᑦ, ᑎᑭᓯᓂᐊᕐᕕᒃ ᐃᓚᒋᓕᐅᑎᑎᑦᔪᑦ ᐃᓄᐃᑦ ᖃᐅᔨᒪᔭᖏᓐᓂ ᐅᓪᓗᒥᐅᓕᖅᑐᖅ ᐊᑐᖅᑕᐅᕙᑦᑐᓂᑦ ᐊᑐᖃᑦᑕᖅᑐᑎᑦ. ᓄᓇᒦᓐᓂᕐᒧᑦ ᐊᒻᒪ ᐱᖅᑯᓯᓄᑦ ᖃᐅᔨᒪᓂᐅᔪᓂᑦ ᐱᓕᕆᐊᓕᐅᕐᓂᖏᑦ, ᑐᑭᒧᐊᖅᑎᑕᐅᔪᑦ ᐃᓐᓇᑐᖃᕐᓄᑦ, ᑐᑭᓯᓂᐊᕐᕕᒃᑯᑦ ᐱᒻᒪᕆᐅᑎᓛᕆᔭᖏᑦ ᐱᓕᕆᔭᐅᔪᑦ. ᒥᑭᒋᐊᕐᓂᐊᓂᒃᑯᑦ, ᐃᖃᓗᒐᓱᐊᓂᕐᑯᑦ ᐊᒻᒪ ᐱᖅᑯᓯᓄᑦ ᓴᓇᕐᕈᑎᓕᐅᕐᓂᒃᑯᑦ, ᐃᓚᒋᒋᔭᐅᖃᑕᐅᔪᑦ ᐃᓕᓐᓂᐊᕈᓐᓇᖅᑐᑦ ᐃᓄᓐᓄᑦ ᖃᐅᔨᒪᔭᐅᔪᓂᑦ ᐆᒪᑎᑦᑎᓯᒪᔪᑦ ᐃᓄᓐᓂᑦ ᐊᒥᓱᐊᓗᓐᓂᑦ ᐊᕐᕌᒍᓂᑦ. ᐅᖓᑕᐅᔾᔨᔪᓂᑦ ᑖᒃᑯᓂᖓ ᐱᕕᔅᓴᐅᔪᓐᓇᖅᑐᓂᑦ, ᑐᑭᓯᓂᐊᕐᕕᒃ ᐱᑕᖃᖅᑎᑦᑎᔪᑦ ᖃᐅᑕᒫᑦ ᐃᓯᕋᔅᓴᐅᓪᓗᓂ ᓂᕿᑦᑎᐊᕙᓐᓂᑦ ᓂᕆᔭᔅᓴᖃᖅᑎᑎᓪᓗᑎ, ᓴᓇᔭᐅᒐᔪᑦᑐᑦ ᐃᓄᐃᑦ ᓂᕿᖏᓐᓄᑦ. ᐱᓕᕆᐊᓕᒫᑦ ᐊᒻᒪ ᐱᔨᑦᑎᖅᑕᐅᔪᑦ ᐱᑕᖃᖅᑎᑕᖏᓐᓂ ᑐᑭᓯᓂᐊᕐᕕᒃᑯᑦ ᐃᓄᑦᑎᑑᖅᑐᑦ ᐊᒻᒪ ᐊᑭᖃᖏᑦᑐᑦ ᐃᓚᒋᔭᐅᖃᑕᐅᔪᓄᑦ.
ᐱᓕᕆᐊᖏᑎᒍᑦ, ᑐᑭᓯᓂᐊᕐᕕᒃᑯᑦ ᐃᓐᓇᑐᖃᖏᑦ ᑐᓂᓯᖃᑦᑕᖅᑐᑦ ᖃᐅᔨᒪᓂᖏᓐᓂ ᐊᒻᒪ ᐊᑐᖃᑦᑕᖅᓯᒪᔭᖏᓐᓂ ᐃᓚᒋᔭᐅᖃᑕᐅᔪᓄᑦ ᐃᓕᓐᓂᐊᕈᒪᓂᖃᖅᑐᑦ ᐃᓄᐃᑦ ᖃᐅᔨᒪᔭᖏᓐᓂ ᐊᒻᒪ ᑲᑎᓐᖓᖃᑕᐅᓗᑎ ᐃᓄᐃᑦ ᐃᓅᖃᑎᒌᓐᓂᕐᒧᑦ ᐱᒻᒪᕆᒋᔭᖏᓐᓂ. ᐃᓄᐃᑦ ᖃᐅᔨᒋᐊᕐᕕᖃᖃᑦᑕᖅᑐᑦ ᑐᑭᓯᓂᐊᕐᕕᒻᒥ ᐃᓛᓐᓂᒃᑯᑦ ᐱᒡᒐᓴᖅᑐᓯᐅᖅᐸᑦᑐᑦ ᐃᓚᒋᔭᐅᖃᑕᐅᓗᑎ ᓯᐊᒻᒪᖅᓯᒪᓂᖅᓴᒧ ᓄᓇᓕᒻᒧᑦ. ᐱᓕᕆᐊᕆᓗᒍ ᑕᒪᓐᓇ, ᐃᓐᓇᑐᖃᐃᑦ ᐃᑲᔪᖅᑏᑦ ᐃᑲᔪᖅᑕᐅᕕᒻᒨᕋᔪᖃᑦᑕᖅᑐᑦ, ᑎᒍᔭᐅᓯᒪᔪᓂᑦ ᐃᑉᐱᒍᓱᓐᓂᖃᖅᑎᑎᓪᓗᑎ ᓄᓇᓕᒻᒧᑦ ᐊᒻᒪ ᐱᖅᑯᓯᓄᑦ ᐃᓚᒋᔭᐅᑎᑕᐅᓂᕐᒥᑦ. ᑲᑎᖃᑦᑕᖅᑐᑎ ᑲᑎᓐᖓᓪᓗᑎ 20 ᑎᑭᑦᑐᒍ 30, ᐃᓚᒋᔭᐅᖃᑕᐅᔪᑦ ᑐᑭᒧᐊᖅᑎᑕᐅᕙᑦᑐᑦ, ᐃᑲᔪᖅᑕᐅᕙᑦᑐᑦ, ᐊᒻᒪ ᐃᖅᑲᐃᑎᑕᐅᓪᓗᑎ ᐃᓄᑑᖏᒻᒪᑕ. ᑐᑭᓯᓂᐊᒃᕐᕕᒃᑯᑦ ᐃᓐᓇᑐᖃᕐᓄᑦ ᐃᑲᔪᖅᑕᐅᕙᑦᑐᑦ, ᐃᑲᔪᖅᑐᑎ ᑲᑎᓐᖓᖃᑕᐅᖏᓐᓇᓂᕐᒧᑦ ᐱᖅᑯᓯᖏᓐᓄᑦ. ᐃᓐᓇᑐᖃᐃᑦ ᐱᑕᖃᖅᑎᑎᒻᒥᔪᑦ ᐃᑉᐱᓐᓂᐊᓂᒃᑯᑦ ᐊᒻᒪ ᐱᖅᑯᓯᓄᑦ ᐃᑲᔪᓂᕐᒥᑦ ᐅᖄᓚᐅᑎᒃᑯᑦ ᐅᕝᕙᓘᓐᓃᑦ ᐊᔾᔨᓕᐅᕈᑎᒃᑯᑦ ᑲᑎᒪᓂᕐᒧᑦ ᐃᓄᓐᓄᑦ ᐊᔾᔨᐸᓗᖏᓐᓂ ᖃᓄᐃᓕᖓᓂᖃᖅᑐᓂᑦ ᖃᓪᓗᓈᑦ ᓄᓇᖓᓐᓂ ᑲᓇᑕᒥ.
ᓯᓚᕐᔪᐊᖅ ᓵᓐᖓᑦᑎᓚᐅᕐᓂᖓ ᐊᑦᑕᓇᕈᑎᒥᑦ ᓄᕙᒡᔪᐊᕐᓇᖅ−19, ᑐᑭᓯᓂᐊᕐᕕᒃᑯᑦ ᐃᖅᑲᓇᐃ ᐱᑕᖃᖅᑎᑦᑎᓚᐅᖅᑐᑦ ᐱᑕᖃᕆᐊᖃᖅᑐᓂᑦ ᐃᑲᔪᖅᑕᐅᓂᕐᒧᑦ ᐊᒻᒪᒪ ᐊᑲᐅᔅᓴᓂᕐᒧᑦ ᓇᓗᓇᕈᑎᑕᖃᖅᑎᓪᓗᒍ. ᐊᒥᓲᓂᖏᑦ ᐃᓯᖃᑦᑕᖅᑐᑦ ᐳᓛᕆᐊᖅᑐᑦ ᒪᕐᕈᐊᖅᑎᓗᐊᖅᓯᒪᓕᖅᑐᑦ ᒪᕐᕉᓂ ᐊᕐᕌᒎᓐᓂ ᐊᑦᑐᖅᑕᐅᓛᖑᓯᒪᔪᓂᑦ ᐋᓐᓂᐊᓇᕐᒧᑦ. ᐱᔭᐅᔪᒪᓂᖏᑦ ᐱᔨᑦᑎᖅᑕᖏᓐᓂ ᐊᖏᓪᓕᓯᒪᒐᓗᐊᖅᑎᓪᓗᒋᑦ ᓄᑖᓄᑦ ᖁᕝᕙᒥᓯᓐᓂᖏᓐᓄᑦ, ᑐᑭᓯᓂᐊᕐᕕᒃ ᑲᔪᓯᑎᑦᑎᓚᐅᖅᑐᑦ ᑐᓂᔭᖏᓐᓂ. ᐊᒥᓱᑦ ᐃᓄᐃᑦ ᖃᐅᔨᓯᒪᔪᑦ ᐱᑕᖃᕆᐊᖃᖅᑐᑎᑦ ᐃᑲᔪᓂᕐᒧᑦ ᒥᔅᓴᐅᓴᒐᖅᑐᑕᖃᖅᑎᓐᓇᒍ ᐊᒻᒪ ᐃᓄᑑᑎᑕᐅᓂᕐᒧᑦ.
ᑕᒪᑐᒪᓂ ᐊᕐᕌᒍᒥ, ᑐᑭᓯᓂᐊᕐᕕᒃ ᐱᓚᐅᖅᑐᑦ ᐊᓐᓇᐅᒪᒃᑯᑦ ᓯᔪᓪᓕᖅᐹᖓᓂ ᓄᓇᓕᒻᒥ ᓂᕈᐊᕋᔅᓴᖑᖅᑎᑦᑎᓂᕐᒧᑦ ᐱᔾᔪᓯᐊᒥᑦ. ᑖᓐᓇ $100,000 ᑐᓂᔭᐅᔪᑦ ᑐᓂᔭᐅᔪᑦ ᓄᓇᕗᒻᒦᑦᑐᓄᑦ ᑮᓇᐅᔭᓕᐅᕋᓱᐊᖏᑦᑐᓄᑦ ᐅᕝᕙᓖᓐᓃᑦ ᑐᓂᓯᑐᐃᓐᓇᖃᑦᑕᖅᑐᓄᑦ ᑲᑐᔾᔨᖃᑎᒌᓄᑦ ᐃᓕᓴᕆᔭᐅᓯᒪᔪᑦ ᓄᓇᓕᖏᓐᓄᑦ ᑎᑭᑦᑎᓂᖏᓐᓄᑦ ᐱᔭᐅᔭᕆᐊᖃᖅᑐᓂᑦ ᐊᕐᕌᒎᓯᒪᔪᒧᑦ.
ᑐᓂᔭᖏᓐᓂ, ᓂᕈᐊᕋᔅᓴᖑᖅᑎᑦᑎᔪᖅ ᑎᑎᕋᓚᐅᖅᑐᖅ, “ᑐᑭᓯᓂᐊᕐᕕᒃᑯᑦ ᐃᓐᓇᑐᖃᐃᑦ−ᐅᖃᐅᔾᔨᒋᐊᖅᑏᑦ ᑕᐃᔭᐅᔪᑦ ᖃᓄᐃᖏᑎᐊᓂᕐᒧᑦ ᐊᒻᒪ ᐱᐱᖅᑯᓯᓄᑦ ᖃᐅᔨᒪᓂᐅᔪᑦ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᑦ ᐃᓕᖅᑯᓯᑦᑎᒍᑦ ᒪᑭᒋᐊᕐᓂᖅ, ᑐᑭᒋᔭᖓ ‘ᓴᓐᖓᑦᑎᕙᓪᓕᐊᓂᖅ ᐱᖅᑯᓯᑦᑎᒍᑦ. ᖃᐅᑕᒫᖑᖃᑦᑕᑐᒃᑯᑦ, ᓴᓐᖓᑎᑦᑎᒋᐊᖅᑐᑦ ᐃᓄᐃᑦ ᐃᓅᓯᖏᓐᓂ ᐱᖅᑯᓯᑎᒍᑦ ᐅᐱᒍᓱᖃᓂᕐᒥᑦ, ᐊᑐᖅᑐᑎ ᖃᐅᔨᒪᓂᐅᔪᓂ ᐱᕙᓪᓕᐊᑎᑦᑎᓂᕐᒧᑦ, ᐃᓄᐃᑦ ᐃᓅᖃᑎᒌᓐᓂᕐᒧᑦ ᐱᒻᒪᕆᒋᔭᖏᑦ, ᐊᒻᒪ ᐃᓄᐃᑦ ᐊᑐᖃᑦᑕᖅᑕᖏᓐᓂ ᐊᒻᒪ ᐊᑐᖅᑕᐅᕙᑦᑐᓂᑦ. ᐱᓕᕆᖃᑎᒌᖃᑎᒋᔭᐅᔪᑦ ᓄᓇᓕᒻᒥ.”
ᐊᓐᓇᐅᒪᒃᑯᑦ ᑐᓴᖅᑎᑎᒻᒪᑕ ᖃᐅᔨᒋᐊᕐᕕᒃᑯᑦ ᓵᓚᖃᖅᑐᑎᑦ ᑲᑐᔾᔨᖃᑎᒌᖑᓪᓗᑎ, ᓄᓇᓕᐅᔪᖅ ᐊᖏᓚᐅᖅᑐᑦ. “ᖁᕕᐊᓱᑦᑎᐊᖅᑐᒍᑦ ᑕᒪᓐᓇ ᑕᑯᓪᓗᒍ! ᑐᑭᓯᓂᐊᕐᕕᒃ ᐱᒻᒪᕆᐊᓘᔪᖅ ᐊᒥᓱᓄᑦ ᐃᓄᓐᓄᑦ.” ᑎᑎᕋᓚᐅᖅᑐᖅ ᐅᖃᖅᑎᐅᖃᑦᑕᖅᑐᖅ, “ᐱᔭᕆᐊᖃᖅᑐᓂ ᐃᓕᓴᕆᔭᐅᑦᑎᐊᕐᓂᖓ” ᐅᖃᓚᐅᖅᑐᖅ ᐊᓯᒃᑲᓪᓐᓂᖓ.
ᓴᐅᒥᒻᒥᑦ ᑕᓕᖅᐱᒻᒧᑦ: ᔭᐃᑯᐴᓯ ᑎᓪᓕᖅ (ᑐᑭᓯᒋᐊᕐᕕᒃ), ᓈᔅ ᓵᒋᐊᑐᖅ (ᑐᑭᓯᒋᐊᕐᕕᒃ), ᑕᐃᕝ ᕕᐅᒪᓐ (ᑐᑭᓯᒋᐊᕐᕕᒃ), ᑖᓐᓂᐅᓪ ᒋᑉᐱ (ᐊᓐᓇᐅᒪ)
ᐊᑦᑐᐃᓂᖃᕐᓂᖓ ᑐᑭᓯᒋᐊᕐᕕᒃᑯᑦ ᐃᖅᑲᓇᐃᔮᖓ ᑕᑯᔭᐅᒧᓐᓇᖅᑐᑦ ᑲᔪᖏᖅᓯᒪᑦᑎᐊᕐᓂᖏᓐᓄᑦ ᐱᕈᖅᑎᑦᑎᓂᕐᒧᑦ ᐊᐅᓚᓂᖃᑦᑎᐊᖅᑐᒥ, ᖁᓚᖏᑦᑐᒥ, ᐊᒻᒪ ᑲᑎᓐᖓᑦᑎᑎᐊᕐᓂᖓᓄᑦ ᓄᓇᓕᒻᒧᑦ. ᑐᓂᓯᖃᑦᑕᖅᑐᑎ ᐃᓄᐃᑦ ᖃᐅᔨᒪᔭᖏᓐᓂ ᐃᓐᓇᑐᖃᕐᓂᑦ ᐊᒻᒪ ᓄᑲᖅᑎᐅᓂᖅᓴᓂᑦ ᑭᖑᕚᓂᑦ ᓇᓗᓴᐃᖅᓯᔪᑦ ᐃᓄᐃᑦ ᐱᖅᑯᓯᖏᑦ ᐊᒻᒪ ᐱᒻᒪᖕᕆᒋᔭᖏᑦ ᓴᐳᒻᒥᔭᐅᓗᑎ ᐊᒻᒪ ᐊᑐᖅᑕᐅᖃᑦᑕᕐᓗᑎ. ᐃᓚᒋᔭᐅᑎᑦᑎᓂᕐᒥᑦ ᑐᓂᔭᐅᔪᓄᑦ ᓂᕆᔭᔅᓴᓂᑦ ᐊᒻᒪ ᐱᓕᕆᔭᐅᔪᓂᑦ ᓴᖅᑭᑎᑦᑎᔪᑦ ᐊᕙᑎᖓᓂ ᐃᓄᒡᒍᑕᐅᔪᑦ ᐃᓚᒋᔭᐅᔪᓐᓇᖅᑐᑎᑦ ᐊᒻᒪ ᑐᑭᖃᑦᑎᐊᖅᑐᒥᑦ ᑲᑎᓐᖓᓕᖃᑎᖃᓂᕐᒧᑦ.
ᑐᑭᓯᒋᐊᕐᕕᒃ ᓇᒦᓐᓂᑐᐃᓐᓇᐅᖏᑦᑐᖅ; ᑐᓐᖓᓇᖅᑐᖅ, ᐅᑉᐱᕆᔭᐅᔪᖅ ᐃᓂᐅᔪᖅ ᐃᑲᔪᖅᑐᑎ ᓇᑭᑐᐃᓐᓈᖅᓯᒪᔪᓂᑦ ᐃᓄᓐᓂᑦ. ᐃᓚᒋᔭᐅᓂᐊᖅᑯᑎᑦ ᐃᓚᒋᔭᐅᕕᔅᓴᐅᓂᕐᒧᑦ ᐱᓕᕆᐊᓂᑦ, ᑲᑎᓪᓗᒋᑦ ᐃᓐᓇᑐᖃᐃᑦ, ᐊᒻᒪ ᐱᕈᖅᑎᑦᑎᓗᑎ ᓄᑖᓂ ᑲᑎᓐᖓᖃᑎᖃᓂᕐᒧᑦ ᐃᖃᓗᓐᓂ. ᖃᐃᓂᐊᖅᑯᑎᑦ ᑐᓐᖓᓱᑦᑎᑕᐅᓂᕐᒧᑦ ᐊᒻᒪ ᐱᖃᕐᓂᑦᑐᓂᑦ ᐃᓄᓐᓂᑦ ᑕᑭᓯᒋᐊᕐᕕᒻᒥ ᐊᔾᔨᐅᖏᑎᑦᑎᔪᖅ ᐊᒥᓱᓄᑦ. ᐃᖏᔾᕕᔅᓴᐅᔪᖅ ᐃᓕᓐᓂᑦ ᐅᑕᖅᑭᔪᖅ.
